Prugraman Fino' Chamoru giya San Diego

Prugraman fino' CHamoru ginnen i gurupon PITI gi iya San Diego

by Pedro Onedera
Guam Pacific Daily News
December 20, 2011

Sigun gi nina'huyong emfotmasion ginen i Gurupon PITI gi iya San Diego, ma anunsia na manma nå'i siha fondon salåppe' ginen i Atmenestrasion Natibon Amerikånu para u ma kondukta dos-åños na Prugråman Fino' CHamoru ni' para u ma adahi i fino'håya giya Mari'ånas.

Para u ma go'te este na cho'cho' gi iya Destriton San Diego, un dångkolon kumunidåt CHåmoru gi sanlagu. Kinonsiste i che'cho' na u ma fotma yan gai'adilånto dosse-membro na gurupu entre hinirasion siha ni' para u ma na'guaha kinalamten put nina'setben fotmåt na fina'nå'guen fino' håya para u ma na'takfe'na i fuetsan mamfifino', mannanaitai, yan manmåmangge' fino' CHamoru åntes di i finakpo'-ña na tiempo.

Esta, guaha dosse-membro ni' kinonsiste as Erika Boatman, si Dorothy Aguon Cedillo, si Delia Cruz, si Ed Diaz, si Carmen Duenas, si Joashawa Elsas, si Bino San Nicolas Jones, si Diana Jordan, si Debbie Lizama-Blas, si Betsy Salas, si Joseph Salas yan si Alfonsina Tina San Nicolas. Gine'hilulu'i i prugråma as Randy Camacho yan inasisiste as Brienda Maanao Diaz.

Manhuhunta i gurupu para u ma planeha i hinanao-ña yan u taimanu ma susedi i prugråma sigun ginen plånon kinalamten gigon monhåyan i mamaila' na såkkan. Put fin, dinira idåt-ñiha i gurupu desdeki disi ocho asta nomåsdi sisenta åños ya mandadanña' rigulåt na tiempo gi iya Guma' Sons and Daughters of Guam gi i kumunidåt San Diego gi kantidån ora siha gi kada tinago' Såbalu.

Maolek entension-ña i gurupu ya gråsihas na ma nåna'i ånimu i fino'-ta tåtkumu malilingu lokkue' entre Mañamoru ni' manggaige gi i sanlagon Estådos Unidos ya maneståba guihi desdeki singkuenta yan kåsi sisenta na såkkan ni' kumontrebubuyi na u manminoriha i taotao Guåhan tåtkumu CHamoru siha gi i isla.

Håfa diniseha para u hago' i Gurupon PITI gi iya San Diego nu este na prugråma? Kumeke'ilekña na para u fanachetton håle' inafa'maolek para i mangahuhulo' na hinirasion ni' ayu ha' ma tungo' put i kadenan Mari'ånas håfa hiningok-ñiñiha ginen mañaina yan mamparentes. Kumeke'ilekña ta'lo na u ma na'lå'la' i fino' taotao ni' kulan ha tutuhon mumalingu gi kåsi maloffan trenta åños na tiempo ya ha pega i fino' håya na dañuyan kontiempo.

Gi iya Guåhan, sigi ha' kumahulo' i tiniffong taotao ni' ti mamfifino' CHamoru esta ya este kumontrebubuyi i finatai putfin gi i lengguåhi. Gi iya CNMI, put mås iya Sa'ipan, tumaiguiguini esta i tinaisetbe-ña entre i mangahuhulo' na manhoben Mañamoru. Ha kontenuha este siempre soluki guaha prugråma siha ni' u fanma adilantuyi para i manetehnan na sopblan i kotturan manaotao tåno', sa' sigi ha' pumoddong i tinaisetbe-ña ya alos uttemo senmalingu gi kåsi 2040 na såkkan sigun ginen inestudion inilao siha gi parehu Guåhan yan iya Estådos Unidos.

Maskeseha bula na fifino' yan i'ilao ma estutudia i fino' håya para tiningo' yan inadahi, lameggai na fuetsa nisisåriu u kahulo' ya u tutuhon gi mismo guma' CHamoru siha sa' debidi u ma empåtte este gi i famagu'on yan famagu'on-ñiha. Debidi todu u fangalamten era ki u lå'la' i fino' CHamoru.

Sigun gi eksperensiå-ku, hagas yu' di hu supok gi kinalamten ma go'te-ña i fino'-ta ya dinira esta nomåsdi tres na dekådu na tiempo. Sumaonao yu' gi iya Nasion CHamoru; i Inetnon Lalåhen Guåhan; i IMMECHA, tåtkumu un inetnon mañaina yan manma'estra/tro para minantienen fino' CHamoru; i Enstetot Fino' yan Kotturan CHamoru; iya Asusiasion Dos kottura Dos lengguåhen Islan Pasifiku siha (PIBBA); ya manayuda yu' fumotma i CHIN na inetnon tåtkumu ma tungo' na Chamorro Linguists International Network ni' ma tutuhon gi iya Bremen, Germany gi 2009 na såkkan; i Ta Tuge', i Fino' Håya, Inc.; yan i Asusiasion Ginen I Hila' I Maga'taotao Siha.

Put mås, fueradi hu fa'nå'gue i fino' CHamoru gi i unibetsedåt, hu ekstende lokkue' setbisio-ku para atbisot para i Galaide' Notte Mari'ånas yan Mañe'lon CHamoru. Inetnon para estodiånte siha este i dos gi iya Unibetsedåt Guåhan. Hu ayuda umestapblesa i sesteman fina'nå'guen fino' CHamoru lokkue' para åmko' siha gi iya Kulehon Kumunidåt Guåhan.

Sumaonao yu' gi komferensian CHamoru ni' ma go'te gi iya Guåhan yan Sa'ipan.

Lalameggai ha' debidi u ma cho'gue para i inadahen fino' håya. Maskeseha gaige i fuetsa gi ma go'te-ña, debi na u ma kalamtini i fuetsa para ma uså-ña. Debidi u ma cho'gue este kada diha. Debidi u guaha kinonsiste para inadahen i fino'-ta ya u ma prisenta este guatu gi i kumunidåt.

Desde egge', estoria, po'ema, kånta yan lepblo siha ni' hu tuge', i kompetasion fino'-ta ni' hu arekla, i Prugråman i Halaihai gi iya Redion Pupbleko KPRG 89.3FM, i prugråman dimimoria ni' ma prisenta nu i estodiånte-ku siha gi iya KGTF-TV Channel 12, i Ferian Huegu yan Hugeti, i Ferian Fina'hechuran Unai, i Ferian Estoria yan Kånta siha, yan kontodu fina'egge' put Hinasson Lina'la', guaha lameggai na ideha yan prugråma siha ni' siña manma cho'gue. Nisisåriu ha' fuetsa, kostumbren chine'gue, yan minalago' para u ma kalamtini este siha.

Lao, ha konne' yu' guatu gi un hinasso na siña ha' pumosipble este siha yanggen guaha fondon salåppe'. Hunggan, salåppe' gof empottånte para u fanma cho'gue este siha. Este, tåddong yan takhilo' na chinanda. Humuyong dångkolo na inabiba para iya Hurao, Inc. yan På'a Taotao Tåno' sa' ma sodda'i fondon salåppe' para u ma na'posipble kantidån prugråma yan aktebedåt.

Lokkue', bai hu nå'i este na bendesion guatu gi iya Gurupon PITI gi iya San Diego. Minaolek suette para este na gurupu ni' ma na'magåhet i inadahen fino' håya para i Mañamoru gi iya San Diego. Biba CHamoru!

Imel Peter R. Onedera giya peteronedera@gmail.com.