Fitma Pat Ti Fitma

Kao Bai Hu Fitma Patosino Ti Bai Hu Fitma
Peter Onedera
GUAM PDN
June 21, 2011

Desdeki ha na'huyong i Navy i dukumenton DEIS yan FEIS, hu baba atadok-hu yan talanga-hu put bai hu ketungo' ineppe siha ni' para u fanma prisenta.

Put para kinahulo' tinaotao, bula debidi u fanma konsidera desdeki guinahan uriya asta asunton susiåt-ikunumiha, yan ayu empottante-ku sigun ginen finakpo' todu manma sångan yan manma cho'gue, håfa u sopbla ni' siempre u ma fåna' ni' taotao-ta. Hunggan, guaha prinimeti put kantidån cho'cho' ni' u guaha, lao kuånto gi iya hita u fanman miresi ni' ginen este na cho'cho' siha? Yan kao magåhet u fanma empleha I taotao tåtkumu manaotao este na tåno'?

Ti åpmam na tiempo tåtte, ha na'huyong kinalamten finetman petision i inetnon Para Hita todu para u fanma rikohi kinse mit na finetma siha ginen taotao Guam ni' sumapopotte i hinatsan i militåt. Ha anunsia i gurupu na ayu mision-ñiha i para u na'huyong mensåhi guatu gi i Konggresson na ha sapopotte iya Guam i minueben Marines, Army, Air Force yan Navy na taotågues yan familian-ñiha magi gi i tano'-ta Guam.

Ma å'agang-maisa siha I Para Hita Todu na bos i "mayorihan mansilensio" tåtkumu ma sapopotte i minueben kantidå sa' put para u fan pribeni opottunidåt inadilånton ikunumiha siha. Lao ayu ma såsangan lokkue' nu este na gurupu na ti u ma tohgiyi puesto put asunton kinendenan tåno' osino asunton susiåt ni' ma pega ginen i manmeyeng, manggaitiningo' yan kontråriu siha put i hinatsa ni' sigi ha' ma eppok para u ma oppe. Sengklåru na i Para Hita Todu ma chochonnek i patten sibit yan i enteres i kumetsiånte siha, lao mistet debidi ta fan maggem put este kosaki ta fan priparao nu i ittemon i hinatsa ni' para ta fåna' piot sa' ti klåklaru lokkue' håfa finakpo'-ña.

Ilek-ñiha i Para Hita Todu na i hinatsa gi iya Guam, "u mås asigurao na inadilånton ikunumiha" ya i sapotten-ñiha na taotågues manhanånaomo'na enlugåt di u fanhanånaotåtte. Sigun ginen inadilånton ikunumiha yan mubimenton hinanao, debidi ta fan responsåpble ya mungnga na ta chule' ha' håfa bali-ña i fasu-ña ni' ta lili'e'. Gof piligru na para ta aksepta ha' i minueben militåt mågi gi i tano'-ta yanggen ti ta goftungo' håfa para ta sosodda' mo'na.

Yanggen ma fitma i petision i Para Hita Todu pues mannana'huyong hit mensåhi guatu gi i taotao-ta na manaprebao hit nu este na prinimeti ni' puru ha' sanme'nå-ña a'annok ya siempre despues ta fanhinengang ni' pumalu hiniyong-ña.

Maolek na guaha bos-ñiha i mayorihan mansilensio alos uttemo, lao ayu måtto gi i hinasso-ku i håfa na manmamatkikilu ha' desde ki i tutuhon? Håfa na ti manggonggong antes di este? Kao manma'å'ñao ha' lokkue' taiguini iya guåhu put i manmamaila' na tiempo yan i guinahan naturåt i tano' ni' u dañuyan?

Senmappot na para bai hu fitma este na petision yanggen bubula ha' kuestion siha ni' tåya' malago' u oppe ni' klåru para bai hu komprende ya siempre taimamamåhlao yu' yanggen bai hu ålok na hu sapopotte este na kinalamten yanggen ti siguru yu' nu i uttemo-ña na plånu para i manmamaila' na tiempo siha.

Gai piniligru este na hinatsa yanggen ti ta kuestiona. Ga'o-ku gonggong på'go ya bai hu famaisen kuestion siha astaki satisfecho yu' enlugåt di bai hu famatkikilu ha' ya bai hu saga gi i santatte ya bai hu nangga astaki guaha guaha ni' para u hongngang ha' yu'. Ilek-ñiha i Para Hita Todu na para u ma supok siha tåddong kontåtki u ma nangga håfa mås para u ma susedi. Lao empottånte lokkue' na u ma tungo' håfa para u ma sedi gi manmamaila' na tiempo ya este ti klåklaru ha' trabiha achokha' kuentos put kuentos ginen i manmå'gas fidiråt yan lugåt-ta ni' tatai fondo ha' desde på'go.

Na'manman lokkue' na i manmå'gas este na inetnon ma å'alok na siña hit manma cho'cho' maolek yan i gobetnamenton fidiråt yan i militåt ni' para u ayuda hit umadahi i irensiå-ta, lao ma sångan lokkue' na hita ha' ni' mismo CHamoru u para u kalamtini este na hinasso para i inadahen i kottura.

Put mås, mambanidosu na ma usa i fino' CHamoru para titulon i gurupu yan lokkue' fino' CHamoru ta'lo para i hinanao i petision ni' para u fanma eppok i manaotao tåno' na u ma fitma. Lebbok i titanos-hu na para u ma usa i fino' håya put para u ma ke'bense i taotao tåno' siha ni' gof dångkolo na insutto yan dañuyan para i lina'la'-måmi. Para guåhu, ti chilong i nina'setben fino' håya yan i entension este na gurupu ni' para u dibidi ham mås enlugåt di u na'fitme i sagan-måmi gi i enteru mundo.

Achokha' håfa na finiho' ma usa para u ma pula' este na petision, ti hu sapopotte i hinatsan militåt ya ti bai hu fitma i petision. Siña ha' ma ålok na humunånaotåtte yu' lao siempre i ñetu-hu siha u ma li'e' håfa kumeke'ilek-hu gi kåsi bente åños na såkkan siha gi manmamaila' na tiempo.

Imel Peter R. Onedera giya ponedera53@yahoo com.